MAPKOMS Inaugura Rádiu Komunidade Lian Proklamadór Francisco Xavier do Amaral iha Turiscai

Ministru ba Asuntus Parlamentares no Komunikasaun Sosiál (MAPKOMS), Francisco Martins da Costa Pereira Jerónimo, inaugura Rádiu Komunidade Lian Proklamadór Francisco Xavier do Amaral iha loron sesta-feira, 17 fulan-fevereiru 2023, liu husi programa Diresaun Nasionál Promosaun no Dezenvolvimentu Mídia Lokál (DNPDML), iha postu administrativu Turiscai, munisipiu Manufahi.

Governante MAPKOMS ne’e hateten iha intrevista katak, “objetivu husi lansamentu ida ne‘e komunidade Turiscai hakarak hari‘i Rádiu komunidade atu fásil ba sira hetan informasaun”.

Ministru Francisco Jerónimo mos dehan, “ha’u hanoin Governu tenki responde, tanba iha Konstituisaun hateten komunidade hotu-hotu iha direitu asesu ba informasaun, dalan ida mak liu husi hari‘i rádiu komunidade hodi fó informasaun ba ita nia komunidade sira iha Turiscai no mós iha suku sira ne‘ebé haleu Turiscai ne‘ebé bele hetan ninia frekuénsia”.

Governu nia esforsu no responde ba nesesidade liu-liu relasaun ho komunikasaun ninian, ho nune’e komunidade sira mós bele iha informasaun liu-liu programa Governu nian ne’ebé la’o no seidauk hala’o, dehan Ministru Francisco Jerónimo.

Administradór Postu Turiscai, Adriano da Costa iha nia intervensaun hato‘o agradese ba Ministru MAPKOMS, bele harií ona rádiu iha Turiscai, hanesan autoridade lokál prontu atu servisu hamutuk hodi fó informasaun ba komunidade sira. Adriano da Costa mos husu ba responsavél sira atu jere Radiu ba oin ho responsabilidade.

Iha biban ne’e, Joni dos Reis nu’udar Xefe Komisaun Instalasaun agradese ba Governu liu-liu MAPKOMS tanba hatan ona proposta hodi hari’i Rádiu iha Turiscai, tanba proposta ne’e rasik komunidade sira hato‘o desde tinan 2019.

Diretur DNPDML, José da Costa hateten katak, Rádiu komunidade lian Proklamadór ne’e harii husi inisiativa komunidade nian, komunidade rasik mak sei sai nain tanba ne’e komunidade sira tenki garante nia funsionamentu.

Marka presenza iha serimonia ne’e, Minisitru MAPKOMS ho komitiva, Administradór postu Turiscai, Komandante Polísia Eskuadra Turiscai, Presidente Tatoli, reprezentante Veteranu, no mós komunidade sira.

Mídia – DNDI